Қай елдің болмасын валютасы мемлекеттің тарихын тікелей баяндайды, саяси-экономикалық жағдайын және жаһандық дәрежесін сипаттайды. Тарихи мәліметтерге сүйенсек, бүгінгі қазақ елінің аумағында алғашқы күміс монета XV ғасырда пайда болған екен. Отырар қаласында «таньга» деген атпен құйылған монета заманауи теңге атауының шығуына себепкер болды. Ал Қазақстанның ұлттық валютасы- төл теңгеміздің тарихы 1993 жылдан бастау алады. Теңгенің тағдырын айқындаған ресми құжаттардың кейбіріне көз жүгіртетін болсақ, 1993 жылғы 12 қарашада «Қазақстан Республикасының
Ұлттық валютасын енгізу туралы» Президент Жарлығы шықты. Бұл Жарлықта «...Қазақстан Республикасы аумағында 1993 жылғы 15 қарашада сағат 8:00-ден Қазақстан Республикасының ұлттық валютасы – теңге айналымға енгізілсін; 1993 жылғы 18 қарашада сағат 08.00-ден бастап теңге Қазақстан Республикасының заңды төлем құралына айналады» деп жазылған. 1992 жылы елімізде өз валютамызды шығару жолында батыл қадамдар қолға алынып, кешенді жұмыстар атқарылды. Соның нәтижесінде ұлттық валютамыз-теңге айналымға енді. Уақыт талабына сай, оның дизайны өзгеріп, қорғаныштық қабілеті жетілдіріліп отырды. Теңге-тәуелсіздігіміздің төл перзенті. Ол сонымен қатар Гимн, Ту, Елтаңба секілді басты атрибуттармен қатар жүретін егемендігіміздің бірден-бір нышаны. Осылайша 15 қараша-Қазақстан тарихындағы атаулы күндердің біріне, ал теңге - ел Тәуелсіздігі мен мемлекеттілігінің басты белгісіне айналды. Биыл Ұлттық валютамыз - теңгенің айналымға енгеніне 30 жыл толады. Осы жылдар ішінде ұлттық валютамыз Қазақстанның дербес қаржылық, экономикалық жүйесін қалыптастыруға негіз қалады. Тәуелсіздік жылдары ұлттық валютамыздың дизайны бірнеше рет өзгеріп, ерекше коллекциялық монеталар да шығарылды. Қазіргі таңда елдің төл валютасы экономикалық саясаттың тәуелсіздігін, тұрақтылығын және бүкіл банк жүйесінің қорғанысын қамтамасыз етіп келеді. Сондықтан төл ақшамызға деген сеніміміз жыл өткен сайын артып келе жатқандығын мақтанышпен айтуға болады.
Ниязхан Бейсенов, еңбек ардагері. Түймекент ауылы. |