Медиация бейтарап, әділ, жанжал нәтижесіне мүдделі емес тараптың қатысуымен өтетін дауларды реттеудің жаңа түрі болып табылады. Ол жанжалдардың алдын алу және халықтың  құқықтық сауаттылығын нығайтуды көздейді. Бүгінгі таңда қоғамдық сананы жаңғыртудың бірден-бір жолы медиация институтын дамыту болып отыр.
Жақында аудан орталығы Сарыкемер ауылындағы «Қоғамдық келісім» орталығында республикалық бірыңғай медиация күніне орай «Ашық есік» күні ұйымдастырылды. Оған аудандық Қоғамдық кеңестің төрағасы Жұманғали Құмғанбаев, аудандық келісім кеңесінің төрағасы Қыдыралы  Оралов, аудандық ардагерлер кеңесінің төрағасы Серік  Ермеков қатысты.
Шараның басты мақсаты – аудан аумағында медиация қызметі саласын дамытудың мақсаттары мен міндеттерін түсіндіру, медиация институтының шиеленістерді және дауларды шешудің әдісі ретінде насихаттау, медиаторлардың жергілікті мемлекеттік органдармен, сондай-ақ азаматтық институттармен өзара іс-әрекеттерінің дамуына қолдау көрсету болып табылады. Аталған «Ашық есік» күні аясында қоғамдық қабылдау өткізіліп, тұрғындарға құқықтық кеңестер берілді.
Айта кетейік, медиация күніне байланысты барлық округтерде семинарлар, «дөңгелек үстелдер», азаматтарды қабылдаулар, тұрғындармен кездесулер сынды іс-шаралар ұйымдастырылды.

«Ауыл жаңалығы» - ақпарат.