Жомарттық-адам бойындағы ең  ізгі қасиеттердің бірі. Хакім Абайдың отыз сегізінші  қара сөзінде

мәрттіктің үш сипаты айтылады. Олар: шындық, ақ пейілділік, даналық. Осы үш сипаттан тағы үш түсінік тарайды: шындықтан әділет, ақпейілділіктен шапағат, даналықтан ақиқат мағлұм болмақ. Бойында осындай қасиеттері бар жаны жомарт аталса, оның жасаған істері жомарттық деп аталады. Жомарттық – қолында байлығы бар азаматтың мұқтаж жандарға жасайтын қайырымдылық көмегі. Қайырымдылық-жомарттың өзегі болғандықтан бүгінде осындай ізгілікті істің көшбасында  тұратын  аудандық іскер әйелдер қауымдастығы бұл жолы да  мәрттіктерімен даралана білді.
Жаңажылдық мереке қарсаңында аудандық іскер әйелдер  қауымдастығының төрайымы, аудандық мәслихаттың депутаты Тазагүл Кадимованың  бастамасымен Қостөбе, Сарыкемер,  Ботамойнақ, Жаңатұрмыс ауылдық округтерінде  тұратын  мүмкіндігі шектеулі  25 балаларға  тәттілер салынған дорбашалар, жұмсақ және әртүрлі құрастырып ойнайтын ойыншықтар табыс етілді. Тазагүл Кәдімқызы бастаған іскер арулар:  Л. Жабатаева, С. Ақылбаева, Г. Дәулетбаевалар аталмыші балалардың отбасында болып, олардың тыныс-тіршілігімен танысып, Жаңа жыл мерекесімен құттықтады. 
Қайырымдылық шарасы аясында Қостөбе ауылдық округінде тұратын М. Марат, А. Абдибекова, А. Заманбек, сарыкемерлік  О. Дастан, Б. Жайлан, Д. Режепбайлар базарлыққа кенеліп, мәз-мейрам болып қалды.

Өз тілшіміз.

Фото: А.Алдабергов