Салауаттылықты сақтау жайы елімізде жиі айтылып жүргендігі рас. Елбасы Жолдауларында, жуырда жарияланған «Қазақстанның әлеуметтік жаңғыртылуы:

Жалпыға Ортақ Еңбек Қоғамына қарай 20 қадам» атты тұжырамдамасында да қазақстандықтардың қалыпты өмір сүруіне, спорт пен денсаулыққа ден қоюы туралы әңгіме кеңінен сөз болды. «Салауатты өмір салты – мемлекет саулығының кепілі»  - осындай тақырыппен  Бурыл орта мектебінде акция болып өтті. Жастар арасындағы алкогольді ішімдікке қарсы күрес аясында өткізілген іс-шараға аудан әкімдігінің білім бөлімінен, аудандық салауатты өмір салтын қалыптастыру орталығынан және ішкі істер бөлімі мен «Жастар орталығы» коммуналдық мемлекеттік мекемесінен арнайы өкілдер қатысып, жастарға тақырып төңірегінде жан-жақты мағлұматтар берді.
Аудан әкімдігі білім бөлімінің әдіскері И.Спаналиева жасөспірімдердің денсаулығына елімізде ерекше көңіл бөлініп жатқандығын тілге тиек етсе, аудандық салауатты өмір салтын қалыптастыру орталығының директоры С.Бөлтірікова салауаттылықты сақтаудың маңызы туралы айтып, ішімдік, нашақорлыққа бой алдырғандардың болашақ өміріне қауіп төнетіндігі жайында айтып өтті. Ал, аудандық ішкі істер бөлімінің кәмелетке жасы толмағандар ісі жөніндегі бөлімшесінің аға инспекторы, полиция майоры Д.Сағынов жат қылықтарға барғандардың жазаға тартылатындығы жайында әңгіме қозғады. Акция барысында жалындаған жастар «Салауатты өмір салтын қолдаймыз!», «Алкогольді ішімдікке қарсымыз!» сөздерін ұрандата, жұртшылық ортасында арақ құйылған бөтелкелерді сындырып, өртеді, тақырыпқа байланысты өз ойларымен бөлісті.

Өз тілшіміз.