Д.Әміров,
Маңғыстау облыстық сотының төрағасы,
Байзақ ауданының Құрметті  азаматы.

Диірменнің тасындай дөңгелеген уақыт бізді тағы бір жылмен қоштастырып, тағы бір жылмен қауыштырғалы тұр.  Күн тізбегі –айды, ай керуені –жылды толтырып, алға басқан адымыңды айғақтаумен бірге кем түскен тұстарыңа да өз бағасын беретін уақыт – деген ұлы сыншыға адам баласы мейлінше тәуелді.
Осылай дегенде мәртебелі Уақытты ұқыпты пайдаланғанның ұпайы кемімейтінін мойындайсың. Айталық, ұшқан құстың қанаты талатын кең байтақ қазақ жерінде жыл бойы атқарылған жұмыстар қанағат сезіміңді туындатып, бірлігі жарасқан елдің бітімі биіктей берерін көзіңмен көрген сайын көңілің марқаяды.
Қызмет жағдайымен сыртта жүргенімізбен, құлағымыз өзіміз өскен жұртта екенін жасырып бола ма? Байзақ ауданында биылғы жылы 2-3 ауыл көгілдір отынға қол жеткізіп, бірнеше елді мекендердің көше жолдарының реттелуі,  ауызсудың берілуі немесе көпшілік қызметіне арналған нысандардың қатарға енуі,  барлығы анық аймағымыздың ажарланып, өсіп жатқандығының дәлелі ғой. Әрине, бұл тұрғыда аудан басшылығының алған бағыты мен еткен еңбегіне ризашылық сезімімізді сездіріп қойғанымыз мақұл-ау. Аудан халқының өткен жылы өрнекті болса, келе жатқан жылы келбетті болсын. Әр отбасының қуанышы, табысы молайып, ырыс-нәсібі арта берсін деп тілеймін.