Б.Көшкінбаев,
мүлікті жария етуді өткізу жөніндегі комиссия хатшысы.  

«Қазақстан Республикасының азаматтарына, оралмандарға және Қазақстан Республикасында тұруға ықтияр хаты бар адамдарға олардың мүлікті жария етуіне байланысты рақымшылық жасау туралы» 2014 жылғы 30 маусымдағы Қазақстан Республикасының заңын іске асыруға байланысты Қазақстан Республикасы үкіметінің 2014 жылғы 29 тамыздағы №959 қаулысына сәйкес, 2014 жылдың бірінші қыркүйегінен-2015 жылдың 31 желтоқсаны аралығында акция жарияланды.
Аудан әкімінің 2014 жылғы 29 тамыздағы №291-Ө өкімімен аудандағы мемлекеттік мекемелер мен ұжымдардың өкілдерінен барлығы 13 адамнан құралған мүлікті жария етуді өткізу үшін комиссия құрамы бекітілді. Оның төрағасы аудан әкімінің орынбасары Қилыбаев Әзімхан Қилыбайұлы.
Аудан әкімдігі ғимаратынан өтініш білдірушілерге ыңғайлы болу үшін комиссия хатшысына арнайы кабинет бөлінді. Яғни, №21 бөлмеге немесе 2-15-82 жұмыс телефонына кез-келген уақытта хабарласа аласыздар. Хатшының жұмыс уақыты дүйсенбі-жұма күндері сағат 9.00-ден 19.00-ге дейін, 13.00-15.00 түскі үзіліс уақыты.
2014 жылдың 1 қыркүйегі мен 10 қазаны аралығында 192 жеке тұлға комиссия хатшысына құжаттарын көрсетіп, жария етуге жататын мүліктер, қабылданатын құжаттар және жария етуге өтініштерді қабылдау мерзімдері туралы толық мәліметтер алды.
Сонымен қатар, өтініш білдірушілерге заң талаптары түсіндіріліп, ережеге сәйкес акредиттелген сарапшылардың қорытындысын алу үшін сарапшылар жөнінде толық мәліметтер берілді.
Жылжымайтын мүліктің орналасқан жері және басқа мүліктерді өтініш берушінің мекен-жайы бойынша жария ету жөніндегі өтініштерді аудан әкімі аппаратының кеңсесі қабылдайды және тіркейді.