Адам өмірінен қымбат ештеңе жоқ. Сондықтан қоғамдағы ең маңызды мәселелердің бірі – жол қозғалысы қауіпсіздігін қамтамасыз ету. Күн сайын мыңдаған адам көлік жүргізушісі, жолаушы немесе жаяу жүргінші ретінде жол қозғалысына қатысады. Осындай қарбалас тіршілікте жол ережесін сақтау әр адамның өмірі мен денсаулығын қорғаудың басты шарты болып табылады. Жол-көлік оқиғалары бүгінде көптеген елдерде өзекті мәселелердің қатарында. Өкінішке орай, жол апаттары салдарынан адамдар жарақат алып, кейде қайғылы жағдайларға да ұшырап жатады. Мұндай оқиғалардың басым бөлігі адам факторынан, яғни жол қозғалысы ережелерін сақтамаудан туындайды. Жылдамдықты шектен тыс арттыру, бағдаршамның қызыл түсіне өту, қарсы жолаққа шығу, көлікті мас күйінде басқару және телефонға алаңдау – жол апаттарының негізгі себептері болып табылады.
Қазақ халқында «Сақтықта қорлық жоқ» деген нақыл сөз бар. Бұл сөз жол қозғалысына қатысушылар үшін ерекше маңызды. Әрбір жүргізуші өз қауіпсіздігімен қатар, өзге адамдардың өміріне де жауапты екенін түсінуі қажет. Жол үстіндегі бір ғана қателік орны толмас өкінішке әкелуі мүмкін. Жаяу жүргіншілер де жол ережелерін сақтауы тиіс. Кейбір адамдар арнайы өткелдерді пайдаланбай, жолды кез келген жерден кесіп өтеді. Бұл олардың өміріне үлкен қауіп төндіреді. Сондықтан жаяу жүргіншілер тек белгіленген жерлерден өтіп, бағдаршам белгілеріне назар аударуы қажет. Балалардың жол қауіпсіздігіне ерекше көңіл бөлінуі керек. Мектеп қабырғасынан бастап оқушыларға жол белгілерін таныстырып, қауіпсіздік ережелерін үйрету маңызды. Өйткені бала кезден қалыптасқан тәртіп пен жауапкершілік болашақта саналы азамат тәрбиелеудің негізі болады.
Қазіргі таңда елімізде жол қозғалысы қауіпсіздігін арттыру мақсатында көптеген жұмыстар атқарылуда. Жолдар жаңартылып, жаңа белгілер орнатылуда, бейнебақылау камералары көбейтілуде. Халық арасында түсіндіру жұмыстары жүргізіліп, түрлі акциялар мен алдын алу шаралары ұйымдастырылуда. Дегенмен қауіпсіздікті қамтамасыз ету тек құқық қорғау органдарының міндеті емес. Бұл – әрбір азаматтың ортақ жауапкершілігі.
Жол мәдениеті – қоғам мәдениетінің көрсеткіші. Тәртіпті жүргізуші, жауапты жолаушы және сақ жаяу жүргінші ғана қауіпсіз орта қалыптастыра алады. Егер әр адам жол ережесін бұлжытпай орындауды өзіне міндет санаса жол-көлік оқиғаларының саны айтарлықтай азаяр еді.
Жол ережесі – жай ғана заң талаптарының жиынтығы емес, ол адам өмірін сақтауға бағытталған маңызды қағида. Өмір-бір-ақ рет берілетін қымбат қазына. Сондықтан әрқайсымыз жолда жүру мәдениетін сақтап, қауіпсіздік ережелерін қатаң ұстануымыз қажет. Қауіпсіз жол – баршамыздың ортақ мақсатымыз бен жауапкершілігіміз.
«Тәртіп бар жерде – қауіпсіздік бар» демекші, жол ережесін сақтау арқылы біз өз өмірімізді ғана емес, өзгелердің де өмірін қорғаймыз.

Эльанора ҚАЛМАХАН,
М.Х.Дулати атындағы Тараз университетінің 3- курс студенті.