Тал егу - халқымыздың ежелден келе жатқан игі дәстүрлерінің бірі. Мемлекет басшысы Қасым-Жомарт Тоқаевтың 2020 жылғы 1 қыркүйектегі Жолдауында қоршаған ортаны қорғау және экологиялық даму – еліміз үшін алдыңғы кезекте тұрған мәселе ретінде атап өтіп, бес жыл ішінде орман алқабында 2 миллиард, елді мекендерде 15 миллион ағаш отырғызу қажеттігін атап өтті.
Өткен аптаның сенбісінде  аудан орталығындағы “Демалыс саябағында” тал егу шаралары ұйымдастырылды. Айтулы шараға аудан әкімі Олжас Баққараев, аудандық мәслихат төрағасы Бақтияр Ақбаев, аудан әкімдігіне қарасты бөлім басшылары  қатысты.
Аудан басшысы Олжас Елебекұлы көпшілікпен бірге тал егу жұмысына қатысты. Сенбілік аясында 20 түп туя және 130 түп қарағаш отырғызылды.
Бұл күні  тал егу жұмыстарынан бөлек, аудан орталығындағы барлық мекеме, ұйымдар, кәсіпорындар өз ғимараттарының айналасына санитарлық-тазалық жұмыстарын жүргізді.
Қоршаған ортаның тазалығы-баршамызға ортақ міндет әрі келер ұрпақ алдындағы жауапкершілік. “Тазалық тазалаған жерде емес, таза ұстаған жерде болады”- демекші, әркім өз ауласын, үй маңын, көше бойын үнемі таза ұстап отыруы қажет.  Сондықтан аудан тұрғындарын тазалықты сақтауға, туған жерге жанашырлықпен қарауға шақырамыз.

“Ауыл жаңалығы”- ақпарат.