Өңіріміздің өнер иелерінен кенде еместігін  талай айтып жүрміз. Байзақ ауданы басқа салаларда да жақсы көрсеткіштерге ие болып жүргені рас. Әсіресе, спорттағы жетістіктеріміз жетіп артылады. Дүбірлі додаларда намысты қолдан бермеген

ұл-қыздарымыз абыройымызды асқақтатып келеді. Солардың бірі жуырда қол күресінен  Жапонияда өткен он үшінші Азия ойындарының ересектер мен жастар арасындағы сайысында жүлделі І орынды иемденіп, алтыннан алқа таққан жерлесіміз Л.Каримбаеваны аудан әкімі М.Шүкеев қабылдады. Бұған дейін де талай жарыстарда топ жарып жүрген спортшымен мақтанатындығын жеткізген Мұратхан Жүнісәліұлы оны жеңісімен құттықтап, спорттық киім-кешек салынған дорбашаны сыйға тартты. Гүл шоқтарын табыстады.
Ауданымыздың Ботамойнақ ауылдық округінде тұратын 1994 жылы туылған Лаура Мәуленқызын жарысқа дайындаған білікті жаттықтырушы Ілияс Жансақалов екен. Бүгінде Байзақтан шыққан чемпион қыз Литва мемлекетінде өтетін Әлем біріншілігіне дайындалу үстінде. Олай болса, талантты аруға қанатың талмасын демекпіз.

Өз тілшіміз.