Көктал ауылында балалардың бос уақытын тиімді өткізуіне, сондай-ақ ересек тұрғындардың спортпен шұғылдануына қолайлы жағдай жасалған заманауи көпфункционалды ойын алаңшасы ел игілігіне берілді. Бұл – Мемлекет басшысы балаларға ерекше көңіл бөліп, олардың әл-ауқатын Қазақстанның табысты болашағының басты кепілі ретінде атап өткен басымдықтармен үйлескен игілікті жоба.
Жалпы құны 30 млн. теңгені құрайтын жаңа ойын алаңшасы «Алель Агро» акционерлік қоғамының Жамбыл филиалының демеушілігімен салынды. Ашылу салтанатында алғашқы құттықтау сөзді аудан әкімі Олжас Баққараев сөйлеп, жобаның маңыздылығына тоқталды.
– Балалардың бос уақытын тиімді ұйымдастыру мақсатында бірнеше демеушілерге ұсыныспен шыққан едік. Ең алдымен осы бастаманы

қолдаған «Алель Агро» АҚ Жамбыл филиалының директоры Берік Серікбайұлына ризашылығымызды білдіреміз. Ауылдық округ әкімдігімен бірлесіп, қысқа уақытта осындай әсем де қолайлы ойын алаңшасын салып бергендері бізді қуантады. Бүгінде ауданда 260-тан астам спорттық нысан бар, оның 28 балалар ойын алаңы бүгінгі күнге дейін жұмыс жасап тұр. Мырзатай, Үлгілі ауылдық округтерінде де осындай нысандар демеушілер көмегімен іске қосылған. Бұл – кәсіпкерлердің әлеуметтік жауапкершілік танытып, халыққа қызмет етуінің жарқын көрінісі. Сондықтан барша демеушілерге алғысымыз шексіз. Ауыл тұрғындарын жаңа ойын алаңшасының ашылуымен құттықтай отырып, нысанды ұқыпты ұстауға шақырамын. Себебі бұл жоба бюджет қаражатынсыз жүзеге асты,-деді аудан басшысы Олжас Елебекұлы.
Әрмен қарай сөз алған Көктал ауылдық округі ақсақалдар алқасының төрағасы Досмахан Оразбаев ауыл тұрғындарының қуанышын бөлісіп, демеушілерге ақ тілегін арнап, денсаулық пен еңбекте табыс тіледі. Ауыл азаматтары атынан демеушілерге арнайы сый-сияпатта тапсырылды.
-Бүгінгі күн-ерекше күн. Жаңа жыл қарсаңында балалар мен жасөспірімдерге арналған спорт-ойын алаңшасы ашылып отыр. Жастар спортпен шұғылданып, денсаулықтарын нығайтып, болашақта ел намысын олимпиада төрінде қорғаса деген тілек бар. Алаңша құрылысы басталғалы жастардың оны асыға күткенін естідік. Бүгінгі қуанышымен ауыл тұрғындарын құттықтай отырып, аудан және ауыл әкімдеріне, сондай-ақ қолдау білдірген барлық азаматтарға алғысымызды білдіреміз, – деді ойын алаңшасының демеушісі, «Алель Агро» АҚ-ы Жамбыл филиалының аға медициналық дәрігері Шаяхмет Парақұлов.
Салтанатты шара соңында шашу шашылып, демеушілердің қолдауы нәтижесінде ауылға тарту етілген жаңа алаңша тұрғындардың игілігіне ұсынылды.

Жанерке ӘЛТЕН,
«Ауыл жаңалығы».
Көктал ауылы.