А. Бейсебаева, “Мемлекеттік тілді оқыту орталығының” Байзақ аудандық бөлімшесінің оқытушысы.
Егемендіктің ең басты белгісі - тәуелсіз ұлттың нышандары - мемлекетіміздің рәміздері. Қазақстан Республикасының мемлекеттік рәміздері 1992 жылдың 4 маусымында Елбасы Н.Ә.Назарбаевтың Жарлығымен бекітіліп, қабылданды. Әлем тарихында дәл осы күннен бастап біздің елдігіміз
айқындалып, мәңгілік ел болуымыздың жарқын белгісін білдіретін жаңа жарқын күндер қалыптаса бастады.Елбасы Н.Ә.Назарбаевтың Қазақстан жастарына үндеуінде: Рәміздер - тәуелсіз мемлекетіміздің айбынын асқақтатар мемлекеттік нышан болса, оны құрметтеп, қастерлеу әрбір қазақстандықтың азаматтық борышы,- деп ел жастарына сенім артқан болатын. Ел мақтанышы саналатын Мемлекеттік рәміздерге деген терең сүйіспеншілік пен құрметті қалыптастыру мақсатында “Мемлекеттік тілді оқыту орталығының” Байзақ аудандық бөлімшесінде оқытушы Ш.Бахытбектің ұйытқы болуымен “Көк байрағы желбіреген, елім менің” атты тақырыпта ашық сабақ өткерілді. Оған қатысушылар алдымен еліміздің Әнұранын орындады. Бұдан соң қазақ халқының өткен тарихына, мемлекеттік рәміздердің авторларының өміріне, қызметіне шолу жасалды, сонымен қатар рәміздерге сипаттама берілді. Логикалық ойындар ойналды, күрмеуі қиын сұрақтарға жауаптар берілді, әртүрлі жаттығулар арқылы рәміздердің маңыздылығы айтылды. Мемлекеттік рәміздер қалай, қай жерде қолданылытындығы туралы түсінік берілді. Тағылымы мол шара соңында белсенділік көрсеткен тыңдаушыларға құрмет көрсетілді. |