Қазақ халқы ежелгі би өнерінің дәстүрі мен өрнегін сақтап, өзінің рухани қазыналарымен ұштастыра отырып, ғасырлар бойы дамытқан. Қазақ биі халықтың тыныс-тіршілігін, адамның табиғатқа көзқарасын, дүниетанымын айшықтайтын өнер ретінде өркен жайып келеді.
Ынтымақ ауылдық округінде “Мың бұралған бишілер” тақырыбында аймақтық би жарысы өткізілді. Бұл шараға ауылдық округтерден келген өнерлі жастар қатысып, өздерінің би шеберліктерін көрсетті. Кіл мықтылар бас қосқан байқауда  ұлттық және заманауи билерді мың бұрала билеген бишілеріміздің өнеріне көрермендер ыстық ықыластарын білдіріп отырды.
Әділқазылар алқасының ұйғарымымен өз ауылымыздағы “Сырғалым” би тобы бірінші орынды жеңіп алды. Екінші орынды Көптерек ауылдық округінің, үшінші орынды Жалғызтөбе ауылдық округінің бишілері иеленді.
“Өнер талантты өсіреді” дегендей, бекзат өнер саналатын - би өнерінің құдіретін танытқан жеңімпаздарға арнайы дипломдар мен бағалы сыйлықтар табысталды.

Құралай САДЫҚОВА,
Ынтымақ ауылдық округінің жастармен жұмыс жөніндегі маманы.