Кеше Қазақстан Республикасы Парламенті Мәжілісінің депутаты Анас Баққожаев ауданымызға іссапармен келді.
Халық қалаулысы мен “Ауыл” партиясы Жамбыл облыстық филиалының төрағасы Алтай Райқұлов аудан әкімінің орынбасары Болат Сағынбеков, аудан әкімдігі ауыл шаруашылығы бөлімінің басшысы Еркебай Рсалиев, аудандық мәслихаттың депутаты Бағдат Момыновтармен бірге Қостөбе ауылындағы Шерхан Мұртаза атындағы Халықаралық Тараз университетінің Агробиологиялық ғылыми-зерттеу орталығының жұмысымен танысты.
Орталық жұмысын университет ұстазы Қуандық Ситебаев жан-жақты таныстырды. Ол ондағы жылыжайда өсіріліп жатқан инжир, мандарин, апельсин, ананас, банандарды көрсетіп, олардың біздің жерге жерсінгені туралы айтып берді. Біздің өңірге таңсық жемістерді тиісті температурада ұстап, дұрыс күтімдей білсе, одан өнім алуға болатынын баса айтты.

Анас Ахатұлы бастаған мамандар орталық ауласындағы әртүрлі сортта өсірілген алмалар мен жүзімдерді де көрді. Биылғы жылы егіс егуге сырты қоршалып, дайындалып қойылған алқапты да көріп шықты.
Содан соң Мырзатай ауылы жанындағы икрадан форель тұқымды балық шабақтарын өсіріп жатқан жұмыстарменде танысты.

Өз тілшіміз.
Қостөбе ауылы.