Жыл сайын 1 желтоқсанда ДДСҰ шешімімен 1988 жылдан бері Дүниежүзілік СПИД-ке қарсы күрес күні атап өтіледі. Осыған орай 5 қараша мен 5 желтоқсан аралығында СПИД-ке қарсы күрес айлығы жарияланып, осының негізінде аудандық емхананың Байзақ жастар денсаулық орталығында Ашық есік күні өтті.
«Бәрі АИТВ/ЖИТС туралы» тақырыбын қозғаған шараға қатысқан №3 Байзақ колледжінің білімгерлеріне Жастар денсаулық орталығының меңгерушісі Жаудір Мырзаева адам өмірінің қымбаттылығы,  жат қылықтарға бой алдырмай, салауатты өмір салтын ұстанудың маңыздылығын сөз етті. Жамбыл облыстық ЖИТС орталығының үйлестіруші

мамандары, алдын алу бөлімінің эпидемиолог дәрігері Индира Досымова СПИД-тің шығу тарихымен, оның жұғу жолдары және одан сақтану, сондай-ақ, аурудың алдын алу шаралары, емі туралы құнды мәліметтерге тоқталды. Жастар денсаулық орталығының психолог маманы ретінде өзім «Психикалық денсаулық» тақырыбында тренинг ұйымдастырдым. 
Ашық есік күнінде білімгерлерге денсаулық - басты байлық екендігі туралы көптеген пайдалы ақпараттар берілді. Білімгерлер көкейлерінде жүрген сауалдарын қойып, жауаптар алды, тренингтік ойындар жүргізілді.

Айбарша СМАҒҰЛОВА,
психолог.