Ауыл шаруашылығы саласын мемлекет тарапынан қолдау жалғасып, оның көлемі жыл сайын артып келеді.
Осы мақсатта «Агробизнес-2020» бағдарламасы шеңберінде 2014 жылы субсидиялау көлемі өсімдік шаруашылығына – 85,4 млрд. теңге, ал, мал шаруашылығына – 41,6 млрд. теңге,  жалпы сомасы 127 млрд. теңгені құраса, 2020 жылға дейін ауыл шаруашылығын мемлекеттік қолдау көлемі 4,5 есеге дейін ұлғаймақ.
Республикалық бюджет есебінен мал шаруашылығын қолдауға мемлекеттік қолдау бюджеттік бағдарламалар аясында 2 бағыт бойынша жүзеге асырылады. Мақсаты – малдың жалпы санына шаққанда асыл тұқымды малдың үлес салмағын арттыру болып табылады.
Сонымен мал шаруашылығына ағымдағы жылға төленетін субсидия көлемі төмендегіше белгіленіп отыр:
1. Мүйізді ірі қара малына: Селекциялық асылдандыру жұмысын жүргізгені үшін - 30 бас сиырға 1 бас асыл тұқымды етті бағыттағы бұқасы болып, ИСЖ мен ИАС-қа тіркелген болса, тауарлы қожалықтың әр сиырына 18 000 теңге субсидия төленеді. Етті бағыттағы асыл тұқымды және сүтті бағыттағы  асыл тұқымды шаруашылықтың 1 бас сиырына 20 000 теңге төленеді;
2. Отандық асыл тұқымды бұқашық пен асыл тұқымды қашар (құнажындар) сатып алушыға бір бас малына – 154 000 теңге субсидия төленеді;
3. Қой малының (тауарлы және асыл тұқымды қожалыққа) селекциялық асылдандыру жұмысын жүргізгені үшін, малы ИСЖ мен ИАС-қа тіркелген жағдайда және аналық басы 600-ден жоғары болып және осы аналыққа 20 бас асыл тұқымды қошқары болса, әр бас саулыққа 1 500 теңгеден (одан кем болса төленбейді) субсидия төленеді;
4. Асыл тұқымды қой төлін (ұрғашы тоқты, еркек тоқты, тұсақ малын) сатып алған қожалықтың әр бас малына – 8 000 теңге;
5. Асыл тұқымды жылқы малының төлдерін (еркек, ұрғашы, тайлар, құнан, байталдар) сатып алынған шаруашылықтың әр бас малына 40 000 теңге;
6. Асыл тұқымды түйе төлінің 1 басына – 37 000 теңге;
7. Асыл тұқымды шошқа төлінің 1 басына – 15 000 теңге;
8. Асыл тұқымды балапанның 1 басына – 50 теңге;
9. Қолдан ұрықтандырылған (егер де техник ұрықтандырушы мен мал иесінің арасында келісім-шарт болып, ұрықтандырылған аналық сиырдың екі айдан кейін буаз екендігі туралы реакталды тексерудің актісі болған жағдайда) 1бас сиырға – 2 801,8 теңге төленеді.
Сондай-ақ мал өнімдеріне төленетін субсидия көлемі де төмендегідей мөлшерде белгіленген. Атап айтқанда:
1. Биязы жүннің 1 (кг) келісіне (ол үшін тауар өндірушінің қарамағында басқа қойды есептемегенде 600 бастан жоғары биязы жүнді аналық басы болу шарт) 130 теңгеден;
2. Жылқы етінің 1 (кг) келісіне (ол үшін шаруашылықтың қарамағында 75 бас бие болу керек)  92 теңгеден;
3. Қой етінің 1 (кг) келісіне (егер де қожалықтың қарамағында 600 бастан жоғары аналық бас қой малы болса) 100 теңгеден;
4. Сиыр етінің 1 (кг) келісіне (егер де қожалықтың қарамағында 30 бастан жоғары сиыр болса және 12 ай ішінде сойылатын бордақыда тұрған 400 бас бұқасы болса) 120 теңгеден;
5. Сиыр сүтінің 1 литріне (3-ші категория бойынша) егер де қожалықтың қарамағында 30-дан 100 басқа дейін сауын сиыры болса және сауылған сүт қайта өңдеу цехына өткізілсе 10 теңгеден;
- 500 бастан жоғары сиыры барларға 2-ші категориямен 1 литр сүтке 15 теңгеден;
- 1000 бастан жоғары сиыры барларға 1-ші категориямен 1 литр сүтке 25 теңгеден;
6. 20 миллионнан жоғары тауық  жұмыртқасын өндірген қожалыққа өндіріп-сатқан жұмыртқасының 1 данасына 2 теңгеден;
7. Қымыз өндірісіне 25 биеден жоғары бас сауылған жағдайда 1 литріне (егер де өндірілген қымызды пластмас немесе шыны ыдысқа құйып шығаратын цехқа өткізген арнайы құжаты болса) 60 теңгеден;
8. Шұбат өніміне 22 бас інген сауылған жағдайда 1 литр шұбатқа 55 теңгеден субсидия төленеді.
ЕСКЕРТУ: Барлық өткізілген  мал өнімдеріне және сатып алынған асыл тұқымды малдарға субсидия алу үшін – екі жақтың келісім-шарты, накладнойлары, есеп фактурасы және кіріс кассалық ордерлері болуы керек. Сонымен қатар, әр шаруа қожалығының, (жеке кәсіпкердің) – мөрі, 2014 жылға банктен ашылған есеп шоты туралы анықтамасы, кәсіпкерлік (ш/қ-ның) куәліктің көшірмесі, шаруашылықтағы малдың жұқпалы аурудан таза деген ветеринарлық анықтамасының түпнұсқасы, ауылдық округ әкімінен 1.01.2014-1.06.2014 жыл аралығында «осынша малы бар» деген анықтаманың түпнұсқасы, әрбір сатып алынған асыл тұқымды малдың асыл тұқымды куәліктерінің көшірмелері болуы  қажеттігін естеріңізге саламыз.
Байзақ ауданы әкімдігінің ауыл шаруашылығы бөлімі.