Байзақ ауданында сенбіліктер науқаны жалғасуда. Қоршаған ортаны тазалау, ауылдарды жасыл желекпен жайқалту жұмыстары өз нәтижесін беріп келеді. Көктемгі қоғамдық орындарды абаттандыру және сыртқы безендіру екі айлығына түймекенттік жастар да өз үлестерін қосуда.
Өткен сенбі күні ұйымдастырылған сенбілікке ауылдың үлкен-кішісі ұйымшылдықпен қатысып, жан-жақты күл-қоқыстан арылтты. Бұл күні сонымен қатар, Түймекент ауылы «Жастар орталығының» ұйымдастырушысы Ж.Айтуғановтың ұйытқы болуымен 14-29 жас аралығындағы жастардан құралған ұл-қыздар ауылдағы Д.Қонаев атындағы үлкен көшенің бойына жүзден астам қараағаш егіп, әктеді. «Жастардың қолымен егілген талдар ендігі жерде олардың қадағалауында болады», - дейді ауылдағы «Жастар орталығының» жетекшісі Жангелді Айтуғанов. Келешек егелерімен бірге өсіп-өнетін жасыл желектер ауылға көрік беретініне шүбәміз жоқ.

Өз тілшіміз.