|
Қымбатты аудан тұрғындары!
Сіздерді ұлық мереке - Құрбан айт мейрамымен шын жүректен құттықтаймын!
Дін - әр адам үшін рухани негіз, адамгершілік бастауы, ақыл-ой парасаты. Барлық діннің негізі бір – адамзатты ізгілікке бастау.
Ислам діні барлық істе салиқалылық пен сабырлылыққа үндейді. Адамзаттың ізгі құндылықтарын уағыздайтын ата дініміз шектен шығуға, өзгеге қиянат жасауға жол бермейді. Ұлысты ұйыстыратын осы ұлағатты дінді халқымыз өз ұлттық дәстүрімен үйлестіріп, ғасырлар бойы бекем ұстанып келеді.
Қасиетті Құрбан айт жамағаттың бірлігін күшейтіп, өзара бауырластықты арттырады. Сонымен бірге бұл мейрамда адамдар мейірімділік пен қайырымдылық құндылықтарын асқақтатып, жүректен шыққан шынайы ниеттерін білдіріп жатады. Құрбан айт күндері жер жүзінің миллиондаған мұсылмандарымен бірге біздің де отандастарымыз қасиетті Мекке, Мәдина топырағында өздерінің қажылық парыздарын өтеуде.
Қадірменді жамағат!
Сан ғасырлар бойы Құрбан айт Жаратушы Алланың атына құрбандық шала отырып, сенім, рақымдылық, мейірім мен өзара қамқорлық сияқты жалпы адамзаттық құндылықтарды насихаттайтын мереке болып саналады.
Қасиетті Құрбан айтта жасалған бір қайырымды іс басқа уақытта қолға алынған ізгі қадамдардың онына теңестіріледі екен.
Олай болса, Құрбан айт мерекесі күні шалған құрбандарыңыз қабыл болсын. Айтулы мереке әрбір шаңыраққа бақыт, береке, молшылық әкелсін!
Р.Рахманбердиев.
Аудан әкімі.
Құрметті аудан тұрғындары!
Баршаңызды Құрбан айт мейрамымен шын жүректен құттықтаймын!
Ислам діні - адамзатты татулық пен бірлікке, адамзат құндылықтарын құрметтеуге шақыратын дін. Құрбан айт мерекесі - барша жұртты рақымшылық жасап, өкпе – наздарын кешіріп, ынтымақ пен татулыққа, мейірімділікке шақыратын мереке.
Дәстүрлі дініміз Тәуелсіздікпен бірге түлеп, халқымызға қайтып оралды. Бүгінде бейбітшілік белдеуіне айналған Қазақстанда ислам діні кеңінен қанат жайып келеді.
Ендеше, Алла тағала баршамыздың айттан айтқа аман жетуімізді жазсын, ағайын! Келешегімізді кемел, жүзімізді жарқын етсін. Еліміз аман, жұртымыз тыныш, бірлігіміз бекем, бауырымыз бүтін болсын!
Н.Тлепов.
Аудандық мәслихат хатшысы.
Әрбір мұсылман үшін бұл күн рухани жаңғыру, игі ниетпен мұқтаждарға қамқорлық көрсету идеяларымен тығыз байланыста келеді.
Мейірімділік пен әділдік, жауапкершілік пен шыдамдылық тәрізді жоғары рухани құндылықтарды насихаттаушы Құрбан айт Қазақстан халқы үшін айтулы мерекенің бірі. Елбасының жүргізіп отырған сындарлы саясатының арқасында, елімізде діндер мен мәдениеттердің санқилылығына қарамастан, қазақстандықтар арасында сыйластық пен сенімділік қатынастары дамуда.
Қасиетті Құрбан айт жүрегімізге қуаныш ұялатып, біздің рухани тазалығымызды қамтамасыз етсін. Жүрегімізді қуанышқа бөлеп, барлық ақ ниетті істерімізді қолдасын.
Айт қабыл болсын! Барлық аудан тұрғандарына зор денсаулық, отбасыларына амандық пен береке тілейміз!
“Нұр Отан” партиясы аудандық филиалының Саяси кеңесі.
|
