Ел Тәуелсіздігінің 30 жылдық мерекесіне орайластырып, “Салауатты өмір салты - өмір талабы” атауымен 5-8-сынып оқушылары арасында асық атудан аудандық турнир өтті. Балалар шығармашылығы және тәрбие орталығы асық ату үйірмесінің жетекшілері Аманай Кеңесбаев, Бақытжан Серікбаев және Берік Оразбековтің ұйымдастыруымен өткен шараның басты мақсаты - ұлттық спорт түрлерін дамыту, саламатты өмір салтын оқушылар арасында насихаттау. Айтулы турнирге аудан аумағындағы барлық білім ошақтарынан жасақталған 8 команда
қатысып, ептілік, жылдамдық, мергендіктерін сынасты. Асық ату сайысында бірінші орынды Ақшолақ орта мектебі жеңіп алды. 2 орынды Кеңес орта мектебі, 3 орынды Жаңатұрмыс орта мектебі иеленді. Жеңімпаз командаларды Жамбыл облысының ұлттық ойын-Асық ату федерациясының президенті Мұхтар Түктеев және Балалар шығармашылығы және тәрбие орталығы асық ату үйірмесінің жетекшісі Берік Оразбеков құттықтап, ұйымдастырушылар тарапынан әзірленген арнайы кубок, медальдармен марапаттады. Жамбыл облысының ұлттық ойын-асық ату федерациясының президенті Мұхтар Түктеев айтуынша, асық ойындарын балалар, жастар арасында дамыту маңыздырақ екен. «Бұл ойын алғырлық, ептілік, шапшаңдық, мергендік, тез шешім қабылдау, ақыл тоқтатып, айла-әдіс шыңдауда таптырмайтын ойын. Ұлттық ойындарымыз береке-бірлікке шақырып, ынтымағымызды нығайтады. Сол үшін асық, тоғызқұмалақ сияқты ұлттық ойындарды дамытуға үлесімізді қосу міндетіміз», — дейді ол.
Аманай Кеңесбаев, Бақытжан Серікбаев, үйірме жетекшілері. |