Үстіміздегі жылдың 20-26 қаңтары аралығында Өскемен қаласында бокстан 2003-2004 жылы туылған жасөспірімдер арасында Қазақстан Республикасының чемпионаты болып өткені белгілі.
Аталмыш ел чемпионатына біздің облыстан қатысқан он төрт спортшының қатарында байзақтық қос боксшы Альмерей Анарбаев пен Ислам Махашов да өнер көрсеткен болатын. Ауданымызға белгілі жаттықтырушылар Болат Джарымбеков пен Думан Қырғызалиевтен бокс спортының қыр-сырын жетік меңгерген Ғани Мұратбаев атындағы гимназияның 9-сынып оқушысы Альмерей Анарбаев қарсыластар шақ келтірмей, ақтық сында
өз жамбылдық жерлесімен кездесті. Кездесу қорытындысында ұпай санымен есе жіберген Альмерей жүлделі екінші орынға ие болып, күмістен алқа тақты. Төрт жылдан бері Сарыкемер ауылындағы №2 балалар-жасөспірімдер спорт мектебінің бокс бөлімінде жаттығып жүрген Альмерей Анарбаев 2016 жылы Сарыкемер ауылында Б.Жұмаділовтің жүлдесі үшін өткен облыстық турнирде бірінші орынды иеленсе, өткен жылдың қазан айында Тараз қаласында бокстан 2003-2004 жылы туылған жасөспірімдер арасында өткен Жамбыл облысының чемпионатында бірінші орынды алған болатын. Жыл соңында Ақтөбе қаласында бокстан 2003-2004 жылы туылған жасөспірімдер арасында өткен Қазақстан Республикасының Оңтүстік – Батыс аймақтық чемпионатында жүлделі үшінші орынды қанжығасына байлаған Альмерейдің бағындырар биіктері мен алар асуы алда деп білеміз.
Мұхтар Манекеев. |
Обновлено 07.02.2019 09:42 |