Үстіміздегі жылдың 10 қаңтары мен 10 ақпаны  аралығында өткен республикалық «Қамқорлық» акциясы Үлгілі орта мектебінде әлеуметтік педагог Света Ибадуллаеваның ұйытқы болуымен ұйымдастырылды.
Алдымен  ата-аналар комитетінің төрағасы Ж.Бұғыбаевпен  бірге ұйымдастырылған рейд барысында мектеп оқушыларының отбасылық жағдайлары анықталып, қамқорлық көрсетілетін балалар тізімі есепке алынды.
Білім ошағында мәрт азаматтардың қатысуымен өткен акцияда мектеп директоры Ф.Шаухаров,  директордың тәрбие ісі жөніндегі орынбасары Д.Мельдебекова  сөз алып,  беріліп жатқан көмектің маңыздылығына тоқталды. «Мұқтаж жандарға, соның ішінде балаларға көмек беру - қасиетті іс» екенін айтып,  аталмыш акцияның ауданда үлкен қолдауға ие болғандығын, бүгінгі шарапаты мол шараның бала жанына қуаныш сыйлайтындығын да мәлімдеді.
Қамқорлық акциясында ауылдық әкімшілік тарапынан 3 балаға сый-сияпат  үлестірілді. Мектеп ұжымы аз қамсыздандырылған, көп балалы отбасының балаларына, атап айтқанда,  22 оқушыға қыстық пальто, жылы бас және аяқ киімдер, сөмке, оқу құралдары табысталды.
Шара соңында айрықша мәрттік көрсеткен Үлгілі орта мектебінің ұжымына ата-аналар мен балалар алғыстарын  білдірді.

Өз тілшіміз.