Құран Кәрімнің “Әли  Имран” сүресінің 134-135-ші аятында «Аллаһ жақсылық жасағандарды жақсы көреді» делінген. Бір хадис шәрифте: «Бір жақсылық жасауды ойлап, жасай алмаған адамға Алла тағала жасағандай толық бір сауап жазады. Егер сол жақсылықты жасаса, Алла тағала (ол кісінің ықыласына қарай) он,  жеті жүз және одан да көп сауап жазады. Бір жамандық жасауды ойлап жасамаған адамға да Алла тағала толық бір сауап жазады»  депті (Бұхари, Мүслим).
Өткен аптада  аудан орталығындағы “Байзақ баба” мешітінде жұма намаздан соң,  бас имам Р. Азизов пен А. Болатбетовтің  ұйымдастырумен  республикалық  “Мектепке жол” акциясына орай жиын өтті. Жиынға қатысушылар алдында сөз сөйлеген  бас имам  бір сауапты іске он сауап жазылатындығын,  еліміздің түкпір-түкпірінде өтіп жатқан  республикалық  деңгейдегі “Мектепке жол” акциясының   мақсатын айтып, қайырлы іске атсалысып, үлес қосудың маңыздылығын әңгімеледі.  Пайғамбарымыздың (с. ғ.с) хадистерінен  мысалдар келтіре отырып,  әлеуметтік жағынан қорғалмаған, көпбалалы отбасының балаларына,  яғни 10 өренге  сөмке және   қаражат жағынан қолдау көрсетті.
Мұндай қайырымдылық шаралары аудан аумағындағы барлық мешіттерде жалғасын табуда.

Өз тілшіміз.